Biew, bo no tabata tey...

Varios vershon di e blog aki a pasa door di mi cabez. Te cu mi a dicidi di scirbie pa asina mi por sace di mi pensamento. Ya a haci mas di un aña cu bo a bay laga nos. Mama a bin aña pasa pa pasa aña serca nos. Durante e temporada ey mi a bisa mama cu mi lo bay Aruba pa yude cu algun. Mi a logra pa bay pa 2 siman. Pa cu su hacimento di aña nos a bay come cu famia y mama a keda contento.Pa ta sincero mi no kier a bay Aruba. Mi a papie cu Sabine tambe. Mi tabata bokkig den e dianan prome cu mi a bula. Den avion rumbo pa Aruba mi a bin haña sa dicon. Bo no tey mas. Si mi sa cu bo no tey mas pero no ta precisamente esey mi kiermen. Semper cu mi a bay Aruba sea ta pa vakantie of pa motibo di famia abo a bin buscami na Airport.Den Avion mi no tabata ni pensa cu bo no lo ta na cas mas, sino con mi lo sinti ora mi sali pafor y bo no ta para ta wardami. Mi a pensa, pensa y sigui pensa te cu mi a pega soño. Ata mi a spierta, mi a wak un pelicula y nan a ancuncia cu avion ta preparando pa aterisa. Na dado momento mi a stop di pensa y prome cu mi kier a sigui pensa mi a hañami para ta warda mi maleta. Mi a pasa door di aduana y mi a sali pafor. Biew, bo no tabata tey...Mi no a mirabo para den bo bermuda short, camisa botona te na mita (pasobra ta haci un calor) y cu bo slof. Mi a buscabo si pero mi sa cu mi no lo hañabo. Esey a duel mi.Mama a bin buscami y e tabata para pafor. Mi a sali cu mi maleta pafor wak mama para na e auto, y mi a cana bay serca djey. Pfff, biew Aruba a cambia hopi. (Esey ta un otro blog)Den mi estadia na Aruba mi a logra di yuda mama cu basta cos. Mi a haña chance di dal un par di cervez cu George y mi a pasa na Zeerovers. E prome cervez cu mi a cumpra mi a bay para riba e pier di zeerovers y mi a tira e spirito di e cervez den lama pabo. Salud biew! Na Zeerovers tambe mi a buscabo. ta straño cu bo no tey. Ta straño cu mi no ta wak bo ta conversa cu bo amigonan bow rancho. E no ta mescos mas pasobra bo no tey.E parti cu bo no tey mi ta compronde, pero na mes momento mi ta haña no solamente bo falta pasobra bo no tey pero falta di cosnan cu mi ta custumbra di haci cubo. Tin biaha mi ta hasta preocupa pabo. Bo ta bon? Bo mester di algo? Unda bo ta? E ultimo pregunta aki mi lo keda haci mi mes. Comprondemi bon cu no ta algo religioso ni cu mi ta puntra mi mes esaki diariamente. E tema religioso mi no kier mishi. Ta djis un pregunta cu mi tin.Si un hende mester puntrami awe ken ta mi idolo cu orguyo mi ta bise; "Mi tata!". Mi ta haña falta di papia cubo. Entrecambia ideanan y pa bo dunami guiya. Cosnan cu semper nos a haci na momento cu nos tanata hunto. Pero Biew, bo no tey mas...E blog aki ta dedica na mi tata; José Guillermo Aquiles Martinez - 12 september 1943 / 4 juli 2016. (Q.E.P.D.)