Nos dushi Papiamento, unda bo ta?

Mi ta un Arubiano. Esey kiermen mi a nace y lanta na Aruba. Te cu mi 25 aña mi a biba na Aruba. Cu 25 aña mi a muda pa hulanda, unda cu mi a studia y pa cos nan di bida mi a keda biba akinan. Mi a purba di bay Aruba back pero lamentablemente mi no a haña un oportunidad pa establese mi mes na mi isla natal. Ami ta yame; bida tabata tin otro proposito cumi.Mi a lanta den un famia unda cu mi defunto tata tabata tin un nacionalidad Dominicano, mi mama a nace na Aruba y mi ruman major tambe a nace na Aruba. Mi tata tabata papia y communica perfectamente den papiamento ya cu e la lanta na Curaçao (Korsow). E idioma principal cu nos tabata / ta papia y communica na cas ta Papiamento. Mi madushi tabata conta nos storianan na Papiamento sin mescla e idioma cu un otro idioma. (antes tur cos tabata mihor)Na scol ta hulandes tabata e idioma di educashon. Ta te ora cu mi a bay haci mi MBO y HBO (Universidad) cu mi a scohe pa hacie na ingles. Algo cu despues mi a lamenta ya cu mi hulandes a bay hopi atras y mester a traha duro pa mehore. Pero esey no ta e punto di enfoce di mi blog.E ultimo 3 añanan cu a pasa mi a bay Aruba varios biaha. Mare cu tabata pa motibonan positivo, pero lamentablemente no tabata asina. Den e ultimo tres añanan cu a pasa mi a ripara cu Aruba a cambia hopi. (esaki ta mi observashon y no comprondemi malo) Mi a bin ta ripara cu hopi di nos anuncionan of propagandanan (borchi of na TV) ta na un otro idioma cu no ta Papiamento. Atrobe, esaki ta mi observashon unda cu Arubianonan ta papiando un Papiamento mescla cu otro idiomanan. Gracioso ta cu ora mi bay un chine e chines ta papia un Papiamento aunque kibra, pero uno cu bo ta compronde. E Filipino, Colombiano, of e hunlandes mescos. Pero nos rubianonan cu ami a interactua cu nan no. Mi a cuminsa puntra mi mes unda nos dushi papiamento ta? Unda e la bay? Kico a pasa cune y pa ki motibo e ta wordo mescla. Pone antenshon na locutornan di radio of noticia na tv.Mi tin un yiu di 3 aña, Thiago José, cu ken ami ta papia Papiamento so. Mi yiu a nace aki na hulanda y mi no ta papia hulandes cu ne ya cu no ta mi idioma natal. Tambe mi ta haña hopi importante pa e por compronde su tata den e idioma natal di su tata.Mi a cuminsa ta puntra mi mes; Papiamento unda bo ta? Dicon bo ta wordo mescla cu otro idiomanan? Atrobe esaki ta mi observashon. Mi ta refiriendo na e Papiamento cu ta wardo papia na Aruba y no locual cu ta wordo usa riba Medianan Social. Mi ta convenci cu papiando bo idioma natal cu den e caso aki ta papiamento ta importante pa nos idioma y nos isla. Ta algo cu ami como persona ta considera importante.Mi tin basta tempo ta pensando y riparando e cos aki y paes motibo aki mi a dicidi di scirbi e blog aki. (Blog no ta un palabra na papiamento; un articulo?)Aruba ta cambiando (Esey ta un topico pa un otro blog). Nos Dushi papiamento, unda bo ta?